Pera pinagtalunan ng mag-asawa
BABAE KRITIKAL, MISTER PATAY SA SARILING SAKSAK

HINDI nakaligtas sa kamatayan ang isang lalaki matapos saksakin ang sarili habang sugatan ang kinakasama na kanyang unang tinarakan ng kutsilyo sa loob ng kanilang bahay nitong Lunes, 5 Disyembre, sa Maresco Subd., Brgy. Palo Alto, sa lungsod ng Calamba, lalawigan ng Laguna.

Ayon sa ulat ng pulisya, dakong 12:20 pm nagkaroon ng mainitang pagtatalo ang biktimang kinilalang si Rosalie Bress at kanyang kinakasamang si Macario Dañas dahil umano sa problema tungkol sa pera.

Bigla umanong kinuha ng suspek ang isang kitchen knife at sinaksak ang biktima saka nagsaksak sa kanyang sariling dibdib at tiyan.

Nakahingi ng tulong ang biktima at agad siyang dinala ng rescue team sa Global Medical Center Canlubang para malapatan ng atensiyong medikal.

Idineklarang dead-on-arrival ang suspek habang nasa kritikal na kondisyon ang biktima na nananatili sa naturang ospital. (BOY PALATINO)