HATAW! D'yaryo ng Bayan hatawtabloid.com
HIMAS-REHAS ang isang pedicab driver matapos maaktohan ng mga pulis na may bitbit na isang sumpak habang gumagala sa Malabon City, kahapon ng madaling araw.
Kinilala ni Malabon City police chief, Col. Albert Barot ang naarestong suspek na si Rolly Tolentino, 26 anyos, residente sa Sitio 6, Brgy. Catmon.
Batay sa pinagsamang ulat nina P/SSgt. Ernie Baroy at P/SSgt. Diego Ngippol, habang nagsasagawa ng Oplan Galugad ang mga tauhan ng Sub-Station 2 sa Dr. Lascano St., Brgy. Tugatog dakong 12:00 am nang maaktohan nila ang suspek na gumagala sa lugar at may bitbit na improvised gun o sumpak.
Nang sitahin ng mga pulis, hindi pumalag ang suspek kaya’t kaagad siyang inaresto at kinompiska ang dalang sumpak na kargado ng isang bala.
Kasong paglabag sa RA 10591 (Comprehensive Law on Firearms and Ammunitions) ang isasampa ng pulisya laban sa suspek sa piskalya ng lungsod ng Malabon. (ROMMEL SALES)
