NABALI ang buto sa kanang kamay ng isang factory worker makaraang kainin ng makina ang suot niyang guwantes sa loob ng pinagtatrabahuang pabrika ng candy sa Navotas City, kamakalawa ng hapon.
Dinala sa Orthopedic Medical Center (OMC) sa Banawe St., Quezon City ang biktimang kinilalang si Marlon Policarpio, 28 anyos, residente sa Villa San Paolo Subd. Sta. Maria, Bulacan.
Sa pahayag ng biktima kay P/Cpl. Florencio Nalus, may hawak ng kaso, abala sila sa loob ng Columbia Candy Factory Corp., na matatagpuan sa Escoda St., Brgy. San Rafael Village, Navotas City nang maipit ang suot niyang guwantes sa makinang kanyang pinamamahalaan.
Nakahingi ng tulong sa mga katrabaho si Policarpio
para dalhin siya sa pinakamalapit na pagamutan at kalaunan ay inilipat sa OMC sa Quezon City.
Inasahan ng pamilya na sasagutin ng kompanya ang mga gastusin sa pagamutan lalo ngayong wala pang katiyakan kung makapagtatrabaho pang muli ang biktima sa pabrikang gumagawa ng sikat at paboritong Pochi. (ROMMEL SALES)
