CAUAYAN CITY, Isabela – Patay ang isang lalaki habang sugatan ang dalawa niyang kasama nang makoryente sa Brgy. Antonino, Alicia, Isabela kamakalawa.
Ang namatay ay kinilalang si Roderick Abedosa, 32, residente ng Aurora, Alicia, Isabela.
Habang inoobserbahan sa ospital sina Jaime Longgat, 29, at Ramon Quero, 61, kapwa residente ng Antonino, Alicia, Isabela.
Sa imbestigasyon ni PO2 Randel Taruma, imbestigador ng Alicia Police Station, naghuhukay sina Longgat at Quero para sa ginagawang bombahan nang dumating si Abedosa para tulungan silang ilagay ang tubo sa kanilang hinukay na butas.
Sa hindi inaasahang pangyayari, nadulas si Abedosa at nabitiwan ang tubo.
Aksidenteng sumagi ang tubo sa linya ng koryente na nagresulta ng kanilang pagkakoryente.
Ang tatlong biktima ay agad dinala sa ospital ngunit hindi na umabot nang buhay si Abedosa.
