Simon may injury sa likod

INAMIN ni San Mig Super Coffee head coach Tim Cone na nagulat siya sa hindi paglaro ng isa sa kanyang mga pangunahing pambato na si Peter June Simon sa quarterfinals ng PBA Governors’ Cup noong Martes ng gabi.

Hindi naglaro si Simon sa 97-90 na panalo ng Coffee Mixers kontra San Miguel Beer dahil sa sakit sa likod.

“We didn’t get the word on PJ (Simon) until two hours before the game started that he couldn’t even stand up at home. Shocking because we just had a shootaround this morning. That was a big blow for us, PJ means so much for this team,” wika ni Cone.

Ngunit kahit wala si Simon ay tumulong ang rookie na si Justin Melton para pabagsakin ng Mixers ang Beermen.

Nagtala si Melton ng 16 puntos bilang suporta kay Marqus Blakely na nagtala ng 25 puntos at 18 rebounds.

Hindi sigurado si Cone kung lalaro si Simon sa Game 1 ng semis kung saan haharapin ng San Mig ang Talk n Text.

Naunang sinibak ng Tropang Texters ang Barako Bull, 99-84, upang makapasok din sa semis.

(James Ty III)