HATAW! D'yaryo ng Bayan hatawtabloid.com
MARIIING itinanggi ni dating senador at ngayon ay rehab czar Panfilo “Ping” Lacson ang mga balitang siya ang nasa likod ng aksyon ni Whistleblowers Association president Sandra Cam laban kay Justice Sec. Leila de Lima.
Magugunitang si Cam ang isa sa mga nagsumite ng oposisyon sa Commission on Appointments (CA) laban kay De Lima upang harangin ang pagkompirma sa kalihim bilang DoJ chief.
Nagbanta si Cam na ilalabas ang aniya’y kopya ng “sex video” ni De Lima kapag pinalusot ng CA ang kalihim, ngunit kalaunan ay nakompirma rin ang appointment ng DoJ secretary.
Ayon kay Lacson, hindi sila nagkakausap ni Cam kaya malabong siya ang utak sa paglitaw ng whistleblower.
Wala rin aniya siya ang dahilan para atakehin si De Lima dahil maayos na ang kanilang samahan, bilang kapwa miyembro ng gabinete ni Pangulong Benigno “Noynoy” Aquino III.
Ngunit may hinala si Lacson sa posibleng nasa likod ni Cam, ngunit hindi na niya ito isiniwalat. (HNT)
