RATED R
ni Rommel Gonzales
NAPAKABONGGA na mismong ang Thai male superstar na si Mario Maurer ang nag-endoso ng Pee Mak ng Viva Films!
Si Mario ang bida sa original Thai version ng Pee Mak na ipinalabas sa Thailand noong March 2013 at sa Pilipinas naman ay August of the same year.
Ang Philippine adaptation nito ay ipalalabas sa mga sinehan sa Pilipinas sa October 14 na pagbibidahan nina Wilbert Ross at Bea Binene.
Base sa isinulat ni Jojo Gabinete sa Philippine Entertainment Portal (PEP), sa ipinadalang video recording ni Mario mismo sa Viva Films , sinabi nitong, “Mabuhay Philippines from Mario Maurer!
“Thank you for loving our film ‘Pee Mak.’
“I want to congratulate Wilbert Ross and the whole cast of the Philippine version of ‘Pee Mak.’
“I know guys that you will do it great and I’m inviting everyone to catch up ‘Pee Mak’ in Philippine cinemas on October 14.
“I’m sure guys you’re gonna have a great time there. See you, mahal ko kayo!”
Nakapanayam ni Jojo si Wilbert tungkol sa pag-eendoso ni Mario sa pelikula at inihayag ng Viva actor ang kanyang kasiyahan at karangalang nadama sa gesture ng popular na Thai actor.
“Nakakataba po ng puso,” saad ni Wilbert.
“Siyempre, isa si Mario sa mga talagang big star po sa Thailand. It’s an honor na ma-portray ko ang role niya as Mak sa ‘Pee Mak.’”
Siyempre pa, given a chance, nais makilala nang personal ni Wilbert si Mario.
“Kung may chance po, gusto ko siyang ma-meet dahil high school student pa lang ako, napanood ko na ang movie niya na ‘Crazy Little Thing Called Love’ at ang ‘Pee Mak.’”
Nasa Pinoy version ng Pee Mak sina Vandolph Quizon, Jairus Aquino (na male lead sa Our Yesterday’s Escape ng Viva One), TJ Valderrama at ang male vocalist ng Cup Of Joe na si Gian Bernardino, sa direksiyon ni Victor Villanueva.
