ALAM MO NA!
ni Nonie Nicasio
HAHATAW muli sa pag-arte ang award-winning actor na si Yul Servo. Ito’y sa pamamagitan ng pelikulang “Makikiraan Po” (Let Us Through, Dear Ancestors), na mula sa pamamahala ng internationally acclaimed filmmaker na si Direk Lav Diaz.
Bukod kay Yul, tampok dito sina Christian Bables, Ronnie Lazaro, Bart Guingona, Isabel Sandoval, Bong Cabrera, Rafa Siguion-Reyna, Sri Arjhay Babon, Necias Pataunia, at Daniel Palisa.
Ang naturang pelikula ay nakatakdang mag-premiere sa 83rd Venice International Film Festival. Kaya naman nabanggit ng aktor/public servant sa amin na parang na-feel niyang muli noong baguhan pa lang siya nang tinampukan niya ang pelikulang “Batang West Side” noong 2001, na isinulat at pinamahalaan din ni Direk Lav.
Pahayag ni Yul, “Sakto kuya, magandang vehicle ito sa pagbabalik ko sa showbiz, na binalikan ako ni Direk Lav at may kasunod pa itong pelikula.
“So ngayon ay nakapasok nga, na parang Batang West Side rin ito, na dinala ako sa iba’t ibang bansa, mga festival, na nanalo ako noon ng dalawang Best Actor awards at napuri ang pelikula natin bilang Filipino.”
Masayang dagdag pa ni Yul, “Ngayon, parang ganoon ulit ang nangyayari noong baguhan pa lang ako, na nagsisimula pa lang sa showbiz. Kaya sobrang thankful talaga ako sa project na ito at kay Direk Lav.”
Sa Batang West Side ay nanalong Best Actor si Yul sa dalawang international filmfest, ang CineManila International Film Festival at sa Brussels Independent Film Festival.
Kabilang sa mga pelikulang nagpamalas ng kanyang husay si Yul ang “Naglalayag”, “Torotot (Destierro)”, “Brutus, Ang Paglalakbay”, at iba pa.
Pinuri at kinilala rin ang performance ni Yul sa Naglalayag at Torotot (Destierro) sa international scene, na nagbigay sa kanya ng Best Actor awards sa Brussels Independent Film Festival noong 2004 at 2008, respectively.
Aniya pa, “Siyempre, tuwang-tuwa talaga ako sa pangyayaring ito. Actually nga, hindi ko naman iniisip na pang-international ito, e. Hindi ko pa alam noong una, tapos bandang huli ay sinabi nga ni Direk Lav na target niyang isali ito sa Venice International Film Festival at hindi naman natin alam kung makapapasok.”
Inusisa namin kung paano siya napasali sa pelikulang ito.
Kuwento ni Yul, “Kinausap ako ni Direk Lav, ‘O Yul, dito ka muna, magtrabaho tayo, basahin mo ito at sana ay magustuhan mo.’ Sabi niya sa akin iyon, hindi ko pa nababasa (ang script) nag-opo na agad ako. Sabi pa niya, ‘O, huwag ka na magpa-ahit, kailangan madungis ka…’ So, seven months akong nagpahaba ng balbas, para sa pelikulang ito.
“Kasi siyempre kapag si Direk Lav Diaz ang nagsabi, siyempre ay susundin mo. Direktor na iyong nagsabi, e… kung gusto mong bumalik sa industriya, kailangan gawin mo na…
“Kasi iyong trabaho namin sa pag-arte, kailangan ay nagre-research ka rin, kailangan ay nag-aral ka rin. Hindi puwede iyong mapurol ang utak mo rito, hindi puwede iyong magbobobo-bobohan ka. Lalo na at magbabalik ka,” seryosong sambit pa niya.
Samantala, as an artist naman na sa pagkakaalam namin na si Yul ang masasabing pioneer at nag-iisang medium ang metal art sculpture sa bansa. Hataw to the max din sa larangang ito ang de-kalibreng aktor.
Ang mga obra ni Yul ay makikita next month sa Vienna, Austria, sa group exhibition para sa international audiences sa kanyang sculptural talent na nag-uugat sa cartography, memory, at contemporary metal art.
Ang artistic momentum ng aktor ay magpapatuloy sa kabuuan ng 2026, with group exhibitions sa Nami Art Gallery, Artist Space, at J Studio.
Plus, later this year with Directions VIII: Metro Manila City Maps, ang newest installment ng acclaimed series ng cartographic relief sculptures ni Yul ang aabangan naman.
Bukod sa pagiging aktor at artist, nalaman din namin kay Yul ang kanyang passion sa storytelling bilang radio drama performer sa “Tanikalang Lagot” (Unshackled) sa DZAS 702 AM – FEBC Philippines.
