NABULILYASO ang pasalubong na droga ng isang babae sa kaniyang nakakulong na live-in partner, matapos madiskubre ang shabu na itinago sa kaniyang ari sa lungsod ng Cabanatuan, lalawigan ng Nueva Ecija, nitong Linggo, 19 Hulyo.
Naganap ang insidente sa Nueva Ecija Provincial Jail, Brgy. Caalibangbangan, sa nabanggit na lungsod, nang madiskubre ng jail officer ang hinihinalang shabu na itinago ng suspek sa kaniyang ari.
Sa ulat mula kay Cabanatuan CPS chief P/Lt. Col. Renato Morales kay Nueva Ecija PPO Provincial Director P/Col. Ritchie Claravall, naharang ang naarestong 56-anyos tindera sa regular na inspeksiyon ng mga bibisita sa men’s custodial facility ng panlalawigang piitan.
Nakapkap mula sa suspek ang dalawang maliit na plastic sachet ng .9 gramo ng hinihinalang shabu na tinatayang nagkakahalaga ng P6,120, sa maselang parte ng kaniyang katawan.
Inaresto ang ginang na nahaharap ngayon sa kasong paglabag sa Section 11 ng RA 9165 o Comprehensive Dangerous Drugs Act of 2002. (MICKA BAUTISTA)
