MATABIL
ni John Fontanilla
SI Martin Nievera ang ultimate idol at gustong maka-collab ng singer na si Ram Castillo, ang bagong alaga ng manager at Team Abot Kamay Founder na si Mommy Merly Peregrino.
Bata pa si Ram ay napakikinggan na nito ang mga awitin ni Martin, kaya naman ang mga kanta ng Concert King ang una niyang natutunang awitin.
Bilib kasi si Ram sa husay kumanta at mag-perform ni Martin, kaya nga labis-labis ang paghanga nito sa Concert King.
Hindi na nga baguhan sa pag-awit si Ram dahil taong 2022 ay naging part ito ng Philippine Team sa WCOPA na nakapag-uwi ng dalawang ginto sa singing category.
At sa pagpirma nito ng kontrata kay Mommy Merly, sunod-sunod ang show nito at nakatakda na rin nitong i-record ang kauna-unahang single at kasunod na ang solo concert bago matapos ang taon.