ARESTADO ang nakatala bilang most wanted person (MWP) sa provincial level ng Bulacan sa mas pinaigting pang kampanya ng pulisya laban sa kriminalidad sa lalawigan nitong Linggo, 19 Pebrero.
Ayon kay P/Col. Relly Arnedo, Provincial Director ng Bulacan PPO, natunton at nadakip sa masigasig na operasyon ng mga tauhan ng San Jose del Monte CPS ang suspek na kinilalang si John Clifford Oandasan, sa Brgy. Gaya-Gaya, sa nabanggit na lungsod.
Nakatala si Oandasan bilang rank 7 MWP ng lalawigan sa tatlong bilang ng kasong Rape by Sexual Assault kaugnay sa RA 7610 at Lascivious Conduct sa ilalim ng Sec. 5 (B) ng RA 7610.
Inaresto ang suspek sa bisa ng warrant of arrest na inilabas ng San Jose del Monte RTC Branch 5-FC na may inirekomendang piyansang P200,000 sa bawat kaso.
Matapos maaresto, pansamantalang isinailalim si Oandasan sa kustodiya ng San Jose del Monte CPS habang hinihintay ang pagsisimula ng pagbasa para sa kinasasangkutan niyang kaso sa hukuman. (MICKA BAUTISTA)
