HATAW! D'yaryo ng Bayan hatawtabloid.com
DAHIL sa patuloy na pag-ulan, dala ng hanging Amihan, kinailangang magpakawala ng tubig mula sa tatlong dam sa lalawigan ng Bulacan kung kaya inilikas ang may kabuuang 3,096 residente patungo sa mga itinalagang evacuation center sa bawat komunidad na pinagkalooban ng family food packs mula sa pamahalaang panlalawigan.
Sa pangunguna ng Bulacan Provincial Social Welfare and Development Office (PSWDO) na pinamumunuan ni Rowena Tiongson, nakapagsagawa ng relief operations para sa 1,190 apektadong pamilya dahil sa pagbaha na ang 475 pamilya rito ay mula sa lungsod ng Baliwag; 470 pamilya mula sa Norzagaray; 114 pamilya mula sa San Rafael; 88 pamilya mula sa Angat; 38 pamilya mula sa Plaridel; at limang pamilya mula sa Pulilan.
Personal na binantayan ni Gob. Daniel Fernando ang mga dam at kalagayan ng pagbaha sa lalawigan sa Communication, Control and Command Center (C4) sa Provincial Disaster Risk Reduction and Management Office at nagbigay ng kanyang mga direktiba upang sigaruduhin ang kaligtasan ng mga residente.
“Una sa lahat, siguraduhin natin na coordinated ang mga pamahalaang lokal sa mga inilalabas na anunsiyo ng PGB. Agad ipaalam sa kanila ang mga detalye sa pagre-release ng tubig sa dam at siguraduhin ang mga apektadong pamilya at komunidad ay nailikas na. Tinitiyak rin natin na mabibigyan ang bawat pamilyang apektado ng mga family food pack habang sila ay nananatili sa evacuation centers,” anang gobernador.
Mahigpit na binabantayan ng PDRRMO ang kalagayan ng mga dam sa lalawigan dahil sa kasalukuyan, nasa 214.80 metro ang antas ng tubig ng Angat Dam; 101.04 metro sa Ipo Dam; at 17.42 metro sa Bustos Dam, na mas mataas sa karaniwang lebel ng tubig. (MICKA BAUTISTA)
