HATAW! D'yaryo ng Bayan hatawtabloid.com
HINDI nakaligtasang isang 35-anyos minero nang matabunan sa kinaroroonang kuweba sa Sitio Magadgad, Brgy. Galdang, bayan ng Pasil, lalawigan ng Kalinga nitong Linggo, 4 Disyembre.
Kinilala ng Pasil MPS ang biktimang si Milnar Wa-il Bag-ayan, 35 anyos, binata, at residente sa nabanggit na barangay.
Ayon sa pulisya, pumasok ang minero sa “minahan ng bayan” dakong 3:00 pm noong Sabado, 3 Disyembre, ngunit bigong lumabas at makabalik sa kanilang kampo hanggang 6:00 am, kamakalawa.
Nagtulong-tulong ang kanyang mga kasamahan upang mahanap si Bag-ayan na natunton sa loob ng kuweba sa ilalim ng mga gumuhong bato.
Agad iniulat sa pulisya ang insidente kasunod ng pagkuha sa labi ng biktima.
Sinubukang sagipin ng doktor mula sa rescue team si Bag-ayan ngunit tuluyan nang binawian ng buhay.
