Dalagita nasagip sa cybersex den 3 suspek arestado

NAILIGTAS ng mga awtoridad ang isang babaeng menor de edad mula sa isang cybersex den kung saan nadakip ang tatlo katao sa Brgy. Sta. Cruz V, sa lungsod ng San Jose del Monte, lalawigan ng Bulacan, nitong Sabado ng hapon, 13 Agosto.

Ayon kay P/Col. Charlie Cabradilla, acting Provincial Director ng Bulacan PPO, nagsagawa ang mga tauhan ng San Jose del Monte CPS (WCPD & HRAO) katuwang ang mga Intel Operatives, CSWDO at Regional Anti Cybercrime Unit 3 ng operasyon kaugnay sa Online Sexual Exploitation on Children (OSEC) Anti-Trafficking in Person.

Ikinasa ng mga elemento ng San Jose Del Monte CPS ang operasyon matapos makatanggap ng impormasyong ginagamit ang biktima sa cybersex den dakong 3:00 pm na nagresulta sa pagkakasagip sa isang 14-anyos dalagitang estudyante at pagkakadakip sa tatlong suspek.

Kinilala ang tatlong naarestong suspek na sina Ernesto Perualila, alyas Cano, tumatayong cybersex den operator; Jamar Gondran; at Raymart Buenavista, pawang mga residente sa parehong barangay.

Inihahanda na ang mga kasong Anti-Trafficking in Persons, Rape at Cybercrime alinsunod sa RA 7610 (Child Abuse Law) na nakatakdang isampa laban sa mga suspek.

Samantala, ang nasagip na biktima ay dadalhin sa Bulacan Provincial Forensic Unit (PFU) para sa ano-genital examination. (MICKA BAUTISTA)