DINAKIP ng mga pulis sa lungsod ng Tarlac ang isang babaeng hinihinalang sangkot sa ‘package delivery scam’ na ginagawa sa pamamagitan ng social media.
Kinilala ni P/BGen. Bowenn Joey Masauding, Officer-In-Charge ng Philippine National Police Anti-Cybercrime Group (PNP-ACG), ang suspek na si Marijoe Coquia, 31 anyos, residente ng lalawigan ng Pangasinan.
Naaresto si Coquia sa ikinasang entrapment operation ng pinagsanib na puwersa ng Cyber Financial Crime Unit at Tarlac Provincial Crime Response Team habang nagki-claim ng pera sa isang remittance center na ipinadala ng kanyang biktima.
Sa reklamo ng complainant, gumagamit si Coquia ng pangalan na “Grace Anderson” sa Facebook at nagpapanggap bilang opisyal ng United States Army na nakabase sa Syria.
Nag-imbento ang suspek ng kuwento at sinabihan ang complainant na magpapadala ng kargamento sa kanya na may kasamang cash na nagkakahalaga ng P94,000,000 ngunit kailangang magpadala ang biktima ng P110,000 na pambayad sa Customs.
Matapos magbigay ng pera ay walang natanggap ang biktima kaya nagpasaklolo siya sa mga pulis na agad umaksiyon na nagresulta sa pagkaaresto ng suspek. (MICKA BAUTISTA)
