Bebot patay, 2 sugatan sa 2 sunog sa Maynila

PATAY ang isang babae habang sugatan ang magkapatid sa dalawang magkahiwalay na sunog sa Maynila.

Ayon kay F/Supt. Jaime Ramirez ng Manila Fire Bureau, dakong 7:40 p.m. kamakalawa nang magsimula ang sunog sa ikalawang palapag ng apartment na tinitirhan ng biktimang si Maribel Zamora, 41, sa 2458 Tejeron St., Sta. Ana, Maynila.

Hindi na nakalabas ng apartment si Zamora sa nasusunog nilang unit na naging dahilan ng kanyang pagkamatay.

Nabatid na umabot sa ikatlong alarma ang sunog bago naapula dakong 8:40 p.m.

Samantala, dakong 1:47 a.m. kahapon nang sumiklab ang sunog sa Gonzales Street sa Ermita, Maynila.

Nagsimula ang sunog sa unit ng isang Atty. Cipriano Farrales, 81-anyos.

Umakyat sa ikalawang alarma ang sunog at idineklarang fire-out dakong 2 a.m.

Sa nasabing insidente ay dumanas ng minor injuries ang magkapatid na sina Froilan delos Reyes, 17, at Kenny Rose delos Reyes, 19-anyos.

Kasalukuyang iniimbestigahan ng pulisya ang pinagmulan ng dalawang sunog.