Lolong taxi driver utas sa 3 bagets

PALAISIPAN sa mga awtoridad kung ano ang motibo ng tatlong bagets na bumaril at nakapatay sa 60-anyos taxi driver habang naghihintay ng pasahero sa tapat ng isang ospital kahapon ng madaling araw sa Malabon City.

Kinilala ang biktimang si Gerardo Orias, driver ng Cayaon taxi (UVK-320), residente ng Lot 32, Block 45B, Brgy. Longos ng nasabing lungsod, dead on arrival sa Pagamutang Bayan ng Malabon.

Habang pinaghahanap ang tatlong kabataan suspek na mabilis na tumakas makaraan ang insidente.

Saulat nina SPOs1 Edsel Dela Paz at Jerry Dela Torre, dakong 3:20 a.m. nang maganap ang insidente sa tapat ng isang waiting shed malapit sa isang pagamutan sa lugar.

Ipinarada ng biktima ang minamanehong taxi habang naghihintay ng pasahero nang dumating ang tatlong hindi nakilalang suspek at walang sabi-sabing pinagbabaril si Orias.

Makaraan ay mabilis na tumakas ang mga suspek habang dinala ng mga miyembro ng Barangay Kapayapaan ang biktima sa pagamutan ngunit hindi na umabot nang buhay.

Inaalam kung napagtripan lamang o may malaking atraso ang biktima kung kaya’t tinadtad ng bala ng mga suspek.

Rommel Sales