Baka kinagat, amo ng aso binoga

CAUAYAN CITY, Isabela – Sugatan ang isang 65-anyos magsasaka makaraan barilin ng lalaking may-ari ng baka na kinagat ng aso ng biktima kamakalawa.

Kinilala ang biktimang si Rodolfo Gavina, residente ng Aneg, Delfin Albano, Isabela, habang ang ka-barangay na bumaril sa kanya gamit ang shotgun ay si Elmer Barcelo.

Sa imbestigasyon ng Delfin Albano Police Station, naglalakad si Gavina patungo sa kanyang bukid nang siya ay paputukan ng shotgun ni Barcelo.

Sinasabing hinahabol ni Barcelo ang aso ni Gavina makaraan kagatin ang kanyang ipinapastol na baka.

Hindi nahabol ni Barcelo ang aso kaya ang pinagbuntunan ng kanyang galit ay ang nakasalubong na si Gavina.

Patuloy na nilalapatan ng lunas sa pagamutan si Gavina.