Pag-amin ni Fifth na bisexual, ikinagulat ng kabanda

ni John Fontanilla

NAGULAT ang dating mga ka-boyband (Dance Squad Singers) ni Fifth (Bobby Solomon ) sa ginawang pag-amin nito sa kanyang gender (bisexual). Hindi raw inakala ng mga ito na pusong babae /pusong lalaki ang kanilang kagrupo.

Tsika ni Benjamin De Guzman (Star  Magic talent), isa rin sa miyembro ng Dance Squad Singers at malapit kay Bobby, ”Nagulat ako! Kasi hindi ko alam na bisexual siya. Matagal-tagal din kami nagsama kasi magka-member kami pero hindi namin nahalata na ganoon siya.

“Sa grupo kasi medyo tahimik lang siya, masayahin at ‘yun nga katulad ng sabi niya mahilig mag-request, pero astig din ‘yan kapag may gusto siyang suggestion ipaglalaban niya ‘yun kapag alam niyang makagaganda sa grupo.

“Very perfectionist kasi siya, gusto niya maganda lagi ang performance namin, kaya lagi siyang nagsa-suggest.

“Pero ‘pag hindi napagbigyan ‘yung suggestion niya tumatahimik na lang siya at hindi namin makakausap ha ha ha.

“Magkaibang-magkaiba sila ng kambal niya kasi ‘yung kambal niya (Fourth) go with the flow lang at siya ‘yung vocalist namin.

“Pero walang nag-isip sa amin na bisexual siya, nakikita namin na medyo malambot siya pero hindi namin iniisip na ganoon siya kasi hindi naman siya nagpapakita sa amin na bisexual siya.”

Pero kahit na nga umamin ito na isa siyang bisexual ay hindi naman daw mababago ang pakikitungo niya kay Fifth. Napabilib nga siya nito sa ginawang pag-amin, hindi raw kasi lahat ng tao ay may ganoong klaseng guts na aminin on national television kung ano ka talaga. Kaya naman  saludo ito sa dating kabanda dahil hindi ito nagdalawang-isip na isambulat sa lahat ang totoong gender.

Dagdag pa ni Benjamin na sana ay maging inspirasyon si Fifth ng iba pang hindi maamin kung ano at sino sila at makayanang aminin din ang tunay nilang pagkatao dahil doon sila sasaya at mabubunutan ng tinik sa kanilang dibdib. ‘Yun na!