HATAW! D'yaryo ng Bayan hatawtabloid.com
ni Ed de Leon
WALA naman daw palang objections talaga ang CCP at NCCA sa pagkakalaglag ni Nora Aunor sa idineklarang national artists, sabi ni Secretary Edwin Lacierda. Kasabay niyon ibinigay nila sa mga Malacanang reporter ang sulat ni Felipe Mendoza de Leon ng NCCA na nagsasabing siya o sino man sa NCCA, at sa CCP ay hindi tumututol sa desisyon ng pangulo sa national artists. Ikinatutuwa pa raw nila at may bago ng mga national artist. Media lang daw ang nagpalala ng usapan, at kino-quote raw siya sa mga bagay na hindi niya sinabi. Media lang pala ang may kasalanan.
Ito ang talagang napakarami kong laugh, siguro mga 82. Paanong nasabi ni Felipe de Leon na mali ng quotation sa kanya ng media eh nakikita sa video sa telebisyon kung ano mismo ang kanyang sinasabi. Hindi ba’t noong una pa ay nanggagalaiti siya na sinasabi niyang kailangang ipaliwanag sa kanila ng presidente kung bakit nalaglag si Nora?
Hindi ba’t pati ang kanilang legal counsel na si Trixie Angeles ay nagsabing bagamat walang nilabag na batas o anumang jurisprudence si PNoy sa kanyang ginawang deklarasyon ng national artist, hindi raw dapat nagkaroon ng controversy kung hiningi lang ang advice ng NCCA. Bakit kailangang hingin ng presidente ang kanilang advice?
Kung iisipin mo, iyang NCCA na iyan at iyang CCP na iyan ang sumira sa protocol. Kasi iyong kanilang rekomendasyon sa mga national artist, dapat iyan confidential, pero sino ba ang nagladlad na inirekomenda nila si Nora? Hindi nila binabanggit ang pangalan ni Alice Reyes, o ni Francisco Coching, o ni Ramon Santos na inilaglag noon ni Gloria Macapagal at ngayon nga lang naideklara. Ang matunog lang ay inirekomenda nila si Nora. Sino ngayon ang sumira sa protocol? Tapos ang sisisihin media? Felipe Mendoza de Leon, rebisahin mo nga muna ang ginagawa ng mga tauhan mo.
Bakit hihingi pa ng advice ang presidente sa NCCA matapos na ang rekomendasyon nila ay ma-review rin ng awards committee ng Malacanang, eh sila nga iyong mukhang nakalimot na iyang deklarasyong iyan ay sole prerogative ng presidente at wala silang pakialam maliban sa gumawa ng rekomendasyon. Iyan ba ang magbibigay ng advice. Tapos ngayon ang sisisihin media?
