Cloud 9 sa Siargao, bahagi na ng World Surf League Championship Tour sa 2026
LOS ANGELES, California, USA – Inihayag ng World Surf League (WSL) ang pagdaragdag sa Cloud 9 sa Siargao, Pilipinas bilang bagong Stop ng 2026 Championship Tour (CT) na gaganapin mula Oktubre 31 hanggang Nobyembre 10, 2026.
Ang Philippines Pro na inihahandog ng Philippine Sports Commission (PSC) ay itinaas na mula sa QS 6,000 International tungo sa pagiging opisyal na bahagi ng Championship Tour para sa mga season ng 2026 at 2027.
Nagdagdag ang WSL ng isa pang venue sa iskedyul ng 2026 Championship Tour upang matiyak na maisasagawa ang hindi bababa sa 12 torneo sakaling hindi matuloy ang Surf Abu Dhabi Pro ayon sa nakatakdang iskedyul. Layunin nitong mapanatili ang integridad ng bagong format at kalendaryo ng Championship Tour.
“Masaya naming tinatanggap ang Pilipinas sa Championship Tour sa tulong ng suporta ng Pamahalaan ng Pilipinas,” ayon kay WSL Chief Executive Officer Ryan Crosby. “Ang pag-angat ng Cloud 9 bilang CT venue ay patunay ng world-class na kalidad ng alon nito at ng matatag naming ugnayan. Karapat-dapat itong maging bahagi ng tour at tiyak na magiging malaking hamon ito sa pinakamahusay na surfers sa mundo habang papalapit ang laban para sa world title.”
Kilala ang Cloud 9 sa perpektong right-hand tube na itinuturing na isa sa pinakamagagandang barrel waves sa buong mundo. Magkakaroon din ng Philippines Pro CT Trials bago ang pangunahing torneo kung saan pipiliin ang isang lalaki at isang babaeng lokal na surfer na sasabak bilang wildcards.
Ayon naman kay kasalukuyang World No. 1 Leonardo Fioravanti, sabik na siyang makasabak sa bagong destinasyon.
“Laging kapana-panabik ang makapagkumpetensya sa bagong lugar. Nakakita na ako ng mga video ng Cloud 9 at mukhang napakasayang alon para sa barrel at aerial surfing. Bilang regular-footer, bihira akong magkaroon ng pagkakataong makapag-barrel sa forehand kaya talagang inaabangan ko ito,” ani Fioravanti.
Matagal nang kinikilala ang Pilipinas bilang isa sa mga pangunahing destinasyon ng surfing sa Asya. Ang Siargao International Surfing Cup, na unang isinagawa noong 1996, ang pinakamatagal nang international surfing competition sa bansa at bahagi na ng WSL Qualifying Series mula pa noong 2014.
Bukod sa Championship Tour event, inanunsiyo rin ng WSL na magsasagawa ito ng World Longboard Tour sa La Union sa Enero 2027, na lalo pang magpapalakas sa reputasyon ng Pilipinas bilang pandaigdigang surfing destination.
Ayon kay PSC Chairman Patrick “Pató” Gregorio, isang makasaysayang yugto ito para sa Philippine surfing.
“Ang Championship Tour ay nararapat lamang idaos sa pinakamahuhusay na alon sa mundo, at naniniwala kaming kabilang dito ang Cloud 9 sa Siargao. Isang makasaysayang sandali ito para sa Philippine surfing at magsisilbing simula ng bagong panahon para sa isport. Nawa’y magsilbi itong inspirasyon sa susunod na henerasyon ng mga atleta at maipakita sa buong mundo hindi lamang ang ating mga alon kundi pati ang pangarap, ambisyon at puso ng mga Pilipino,” aniya.
Samantala, sinabi ni PSC Sports Ambassador William Vincent “Vinny” Araneta Marcos na matagal nang nasa Pilipinas ang mga de-kalibreng alon at mahuhusay na surfers.
“Matagal nang narito ang mga alon. Matagal na ring narito ang talento. Ang pagdadala ng WSL Championship Tour sa Pilipinas ang tamang pagkakataon upang maipakita sa buong mundo ang matagal nang alam ng mga Pilipino—nasa ating bansa ang lahat ng hinahanap ng surfing world. Hindi malilimutan ng lahat ang Siargao,” ani Marcos.
Bilang bahagi ng tatlong postseason events ng WSL, lalahukan ang Philippines Pro ng 24 lalaki at 16 babae, kung saan ang mga natitirang world title contenders ay mag-uunahan sa mahalagang puntos bago ang pagtatapos ng season sa Pipe Masters sa Disyembre.
Dagdag pa ni Fioravanti, mas maraming torneo ang nagbibigay ng mas maraming pagkakataong makapagpakitang-gilas.
“Naging napakaganda ng aking taon. Makapagpapahinga muna kami bago muling sumabak. Hindi na ako makapaghintay na makapag-surf sa bagong venue at maranasan ang mga barrel ng Cloud 9,” aniya.
Kasabay nito, inilipat ang Surf Abu Dhabi Pro sa Nobyembre 25-29, isang linggo bago ang Abu Dhabi Formula One Grand Prix, habang inusog din ang MEO Rip Curl Pro Portugal sa Oktubre 16-25, upang mabigyang-daan ang pagpasok ng Cloud 9, Siargao bilang ika-11 hinto ng 2026 WSL Championship Tour.
Natitirang iskedyul ng 2026 WSL Championship Tour:
Stop No. 7 – Teahupo’o, Tahiti (French Polynesia): Agosto 8-18
Stop No. 8 – Cloudbreak, Fiji: Agosto 25-Setyembre 4
Stop No. 9 – Lower Trestles, San Clemente, California, USA: Setyembre 11-20
Stop No. 10 – Peniche, Portugal: Oktubre 16-25
Stop No. 11 – Cloud 9, Siargao, Pilipinas: Oktubre 31-Nobyembre 10
Stop No. 12 – Surf Abu Dhabi, United Arab Emirates: Nobyembre 25-29
Stop No. 13 – Banzai Pipeline, Hawaii, USA: Disyembre 8-20 (PSC/HNT)
