Mula sa Marcos-Duterte
Duterte-Marcos sa 2028, kina-career ni Robin

MAKARAANG ideklara ni Vice President Sara Zimmerman Duterte – Carpio na tatakbo siyang presidente sa eleksiyon sa 2028, agad isinulong ni Sen. Robin Padilla na maging running mate niya si Sen. Imee Marcos.

                Kung noong 2022 national elections, tahasang sinuportahan ni Robin ang Marcos-Duterte (BBM-Sara) tandem, ngayon naman ay Duterte-Marcos (Sara-Imee) na nagsusulong ng kapwa babaeng kandidato sa pinakamataas na pampolitikang posisyon sa bansa.

Sa panayam, sinabi ni Padilla na “one thousand one million percent” ang suporta niya sa kandidatura ni Duterte at si Marcos ang nais niyang maging ka-tandem nito.

Ani Padilla, panahon na para maramdaman ng mga Pinoy ang “girl power” o dalawang babae sa dalawang pinakamataas na posisyon sa gobyerno.

Agad tiniyak ni Padilla na hindi siya tatakbong bise presidente ni Duterte dahil matagal na niyang kinakampanya ang Sara-Imee tandem.

“Ano ako e, Sara-Imee ako e…pagka umiikot ako sa ibang bansa ‘yun palagi ang sinasabi ko, Sara-Imee,” sabi ni Padilla.

Wala rin nakikitang masama si Padilla sa maagang deklarasyon ni Duterte na tatakbong presidente.