Sa Intramuros, Maynila
17-anyos estudyante binugbog ng 2 ‘guardia civil’ sa Intramuros

DALAWANG guwardiya ng Intramuros Administration ang inaresto ng mga Tourist Police ng Manila Police District (MPD) matapos pagbuhatan ng kamay ang isang estudyante na nagbibisikleta sa Intramuros, Maynila, nitong Linggo ng gabi, 8 Pebrero.

Sa imbestigasyon ng MPD Tourist Police, dinakip ang mga suspek ay kinilalang sina Gilbert Mendez, 38 anyos, at Nilo Anub, 28 anyos, kapwa mula sa JSL Security Agency, matapos ireklamo ng pananakit ng isang 17-anyos estudyante mula sa Tondo, Maynila.

Naganap ang insidente dakong 9:05 ng gabi sa bisinidad ng Riverside Plaza Mexico Esplanade, sa nabanggit na lugar.

Nabatid na nagbibisikleta ang biktma nang pahintuin ng mga suspek at sawayin dahil bawal umano ang magbisikleta roon.

Nang hindi agad sumunod, hinabol ng mga guwardiya ang biktima at pinagtulungang saktan.

Nang makauwi ang biktima, nagtungo sila sa himpilan ng pulisya upang magsampa ng reklamo laban sa dalawang security guard na naka-uniporme gaya ng mga ‘guardia civil’ noong panahon ng mga Español.

Kasalukuyan nang nasa kustodiya ng MPD ang mga suspek na nakatakdang sampahan ng kasong pananakit at paglabag sa RA 7610 o ang Special Protection of Children Against Abuse, Exploitation and Discrimination Act sa piskalya.

Samantala, tatanggalan ng Intramuros Administration ng kontrata ang security agency ng mga suspek.