Gunrunner tiklo sa pagbebenta ng baril

INARESTO ng mga awtoridad ang isang lalaki sa isinagawang buy-bust operation laban sa iligal na pag-iingat ng baril sa Floridablanca, Pampanga kahapon, Hunyo 19.

Kinilala ni PRO3 Director PBGeneral Jose S. Hidalgo Jr ang suspek na si alyas “Elias”, 42-anyos, na naaresto ng magkasanib na operatiba ng Pampanga Provincial Intelligence Unit (PIU), Regional Intelligence Unit 3 (RIU3), 1st Provincial Mobile Force Company (PMFC), at Floridablanca Municipal Police Station (MPS) habang nagbebenta ng mga iligal na baril sa Brgy. Bodega, Floridablanca, Pampanga.

Nakuha mula sa suspek ang isang kalibre .38 na revolver, isang shotgun, isang improvised .22 caliber long firearm, isang fatigue green holster, isang white sack na bala para sa shotgun, at .38 caliber revolver, tatlong tunay na Php 500 bill, at Php 1,000 bill boodle money.

Inihahanda na ngayon ang kaukulang kaso ng paglabag sa RA 10591 laban sa suspek para sa referral ng korte. (MICKA BAUTISTA)