Mangingisda patay sa pamamaril

PATAY ang isang mangingisda matapos pagbabarilin ng hindi pa nakikilalang salarin sa bahagi ng karagatan sa Binuangan, Obando, Bulacan noong Linggo ng gabi.

Sa ulat na nakarating kay Brig. Gen. Jose Hidalgo Jr., Central Luzon regional police director, kinilala ang biktima na si Ricky Mark Angel Hidalgo, residente ng Blk 3 Lot 4 Site 8, Phase 2, Area 2, Dagat-Dagatan, Navotas City, Metro Manila.

Lumalabas sa inisyal na imbestigasyon ng pulisya na ang biktima ay pinagbabaril dakong alas-9:30 ng gabi ng suspek na tumakas sa hindi malamang direksyon.

Isinugod ng mga nagrespondeng residente ang biktima sa San Lorenzo Ruiz Hospital pero idineklara na ito ng mga manggagamot na dead on arrival.

Naglunsad ng hot-pursuit operation ang pulisya laban sa suspek at nagsasagawa pa ng imbestigasyon sa posibleng motibo sa likod ng insidente ng pamamaril. (MICKA BAUTISTA)