HATAW! D'yaryo ng Bayan hatawtabloid.com
PABATA nang pabata ang ginagamit sa pagtutulak ng droga makaraang maaresto ang tatlong bagets sa magkahiwalay na drug operation ng pulisya sa Navotas City, kamakalawa ng gabi.
Ayon kay Navotas police chief P/Col. Dexter Ollaging, dakong 10:30 pm nang magsagawa ang mga operatiba ng Station Drug Enforcement Unit (SDEU) sa pangunguna ni P/Lt. Luis Rufo, Jr., ng buy bust operation sa Langaray St., Brgy. North Bay Boulevard South (NBBS) Dagat-Dagatan.
Agad inaresto ng mga operatiba ang kanilang target na si Harold Montañez, alyas Jomar, 18 anyos, matapos bentahan ng P500 halaga ng shabu ang isang undercover police poseur-buyer, kasama si Hazel Marie Ricaport, alyas Ethel, 18 anyos, kapwa residente sa Vitas Tondo, Maynila na nakuhaan ng hinihinalang shabu.
Nakompiska sa mga suspek ang halos anim na gramo ng hinihinalang shabu, may standard drug price na P40,800 at marked money.
Dakong 10:40 pm nang madakma ng mga operatiba ng SDEU si Jonas Estacio, 18 anyos, sa isinawang validation at monitoring sa R. Domingo St., Brgy. Tangos North matapos makuhaan ng tatlong heat-sealed transparent plastic na naglalaman ng hinihinalang pinatuyong dahon ng marijuana na nasa P600 ang halaga.
Mahaharap ang mga suspek sa kasong paglabag sa RA 9165 o ang Comprehensive Dangrous Drug Act of 2002. (ROMMEL SALES)
