Ayaw mabitin sa inuman
LASENGGO TIMBOG SA PANUNUTOK NG BARIL

KALABOSO ang inabot ng isang lalaki matapos tutukan ng baril ang kapatid ng kanyang kainuman sa bayan ng Cuyapo, lalawigan ng Nueva Ecija.

Sa ulat mula sa Cuyapo MPS, kinilala ang arestadong suspek na si Rick Flores.

Nabatid na nakikipag-inuman si Flores sa isang kaibigan nang dumating ang kapatid ng huli upang sumundo.

Dito nagalit ang suspek dahil kapag umalis ang kaibigan ay wala na siyang kainuman at mabibitin siya umano sa pagtagay ng alak.

Ngunit nagpumilit ang kapatid ng kanyang kainuman, bagay na lalong ikinagalit ng suspek kasunod ng pagbunot ng baril at itinutok sa biktima.

Sa takot ay nagmamadaling umalis ang biktima na agad dumeretso sa himpilan ng Cuyapo MPS at nagreklamo.

Hindi na nakapanlaban ang suspek nang arestohin ng mga pulis at susuray-suray na ikinulong sa Cuyapo MPS Jail.

Nahaharap ang suspek sa patong-patong na kasong Grave Threat, Illegal Possession of Firearms (RA 10591) at paglabag sa Comelec Omnibus Election Code o BP 881. (MICKA BAUTISTA)