2 Bulakeño todas sa alon ng Bataan

IMBES tanggal-stress, buhay ng dalawang Bulakenyo ang ‘nilamon’ ng alon habang naliligo sa beach resort sa bayan ng Morong, lalawigan ng Bataan, nitong Miyerkoles, 1 Hunyo.

Sa ulat na ipinadala sa tanggapan ni P/Col. Rommel Velasco, provincial director ng Bataan PPO, kinilala ang mga biktimang sina Jorge Pangilinan, 59 anyos; at kanyang driver na si Ricky Geronimo, 49 anyos, kapwa mga residente sa Brgy. Nagbalon, Marilao, Bulacan.

Nabatid sa ulat, habang naliligo ang dalawang biktima sa dagat ay tinangay sila ng malakas na alon mula 20 hanggang 30 metrong layo sa dalampasigan.

Matapos masagip ng mga rescuer, isinugod ang dalawang biktima sa Morong Rural Health Center ngunit idineklarang dead on arrival. (MICKA BAUTISTA)