Coco mabilis na sinaklolohan si Julia nang tumagilid ang motor na sinasakyan

FACT SHEET
ni Reggee Bonoan

KAAGAD na tumakbo si Coco Martin para alalayan si Julia Montes nang matumba dahil nawalan ng balanse sa motor habang nakahinto siya at naghihintay ng susunod na instructions.

Sa first taping day ni Julia para sa FPJ’s Ang Probinsyano sa Ilocos Sur nitong Sabado ay mabilis nitong binabagtas ang mahabang daan sakay ng malaking motor habang may nakasukbit sa likod nito.

Base sa video na napanood namin ng netizen na nasa likod ni Julia ay huminto ang dalaga at naka-angkla ang dalawa niyang paa nang matumba ang motor dahil sa sobrang bigat nito pero kaagad naman siyang nakatayo habang nagtatakbo si Coco mula sa sasakyang nasa unahan para puntahan siya. 

Panay ang tanong ng aktor kung okay lang ang aktres na tumatango naman at sa bandang huli ay si Coco na ang sumakay sa motor para tumabi muna sila at hindi maging sanhi ng trapik.

Base rin sa video ay kinikilig ang kumuha sa CocoJuls at maging ang mga taong dumaraan ay napapahinto pagkakita kina Mr. and Mrs. Dalisay.

Ilang linggo na lang at lalabas na ang karakter ni Julia sa FPJ’s Ang Probinsyano mula sa Dreamscape Entertainment.

Naaliw kami sa isang komento, “extended ulit si ‘Probinsyano?’ Patatapusin muna niya ang Covid bago matapos?”

Ibig sabihin ay hangga’t may pandemya ay hindi muna tatapusin ang journey ni Cardo Dalisay.