HATAW! D'yaryo ng Bayan hatawtabloid.com
ARESTADO ng mga awtoridad ang 31 kataong lumabag sa batas sa isinagawang anti-crime operations sa lalawigan ng Bulacan nitong 1 Enero.
Ayon kay P/Col. Lawrence Cajipe, provincial director ng Bulacan PNP, kabilang sa nadakip ang 12 drug personalities sa magkakahiwalay na buy bust operations na ikinasa ng Station Drug Enforcement Units ng Balagtas, Pandi, at Meycauayan municipal/city police stations.
Nakuha sa mga suspek ang 16 selyadong plastic sachets ng hinihinalang shabu, isang kahon ng cellphone na naglalaman ng tuyong dahon ng marijuana, drug paraphernalia, at buy bust money.
Nadakip din ang suspek na kinilalang si Leo Manalaysay dahil sa ilegal na droga sa Brgy. Sta. Barbara, sa bayan ng Baliwag, matapos masita ng mga nagpapatrolyang barangay tanod sa hindi pagsusuot ng facemask.
Nang kapkapan at imbestigahan, nasamsam mula sa suspek ang dalawang plastic sachet ng shabu kaya ipinasa siya sa Baliwag MPS para sa interogasyon.
Samantala, sa ikinasang anti-illegal gambling operation ng mga operatiba ng San Jose Del Monte CPS, 2nd Provincial Mobile Force Company (PMFC) at 301st Regional Mobile Force Batallion (RMFB) 3 sa Brgy. Graceville, sa lungsod ng San Jose Del Monte, nadakip ang 10 kataong nagtutupada.
Timbog din ng Bulacan police katuwang ang mga barangay tanod sa pagtugon sa iba’t ibang insidente ng krimen ang anim na suspek sa mga bayan ng Bocaue, Guiguinto, Marilao, Norzagaray, Pandi, at lungsod ng San Jose Del Monte.
Nadakip ang tatlo sa kasong Acts of Lasciviousness, samantala ang tatlo ay arestado sa mga kasong Frustrated Murder, Rape, at Physical Injuries kaugnay sa RA 7610 (Child Abuse Law).
Nakorner ang dalawa kataong matagal nang pinaghahanap ng batas sa bisa ng warrant of arrest ng tracker teams ng Obando at San Jose Del Monte CPS katuwang ang mga elemento ng 2nd Provincial Mobile Force Company (PMFC), 301st RMFB 3 at 24th Special Action Company.
Nahaharap ang mga akusado sa mga kasong paglabag sa Section 10 (a) ng RA 7610 at Attempted Murder.
(MICKA BAUTISTA)
