2 karnaper todas sa QC shootout
TODAS ang dalawang hinihinalang karnaper makaraang makipagbarilan sa mga pulis sa Novaliches, Quezon City, nitong Linggo ng madaling araw.
Bago ang enkuwentro, isang lalaki ang nagpasaklolo sa mga awtoridad nang agawin umano ang kanyang motorsiklo makaraang bumili sa isang tindahan sa Barangay San Bartolome noong Sabado ng gabi.
Ayon sa biktima, pagkasakay niya sa motorsiklo ay tinutukan siya ng baril ng mga suspek at pinababa sabay sibat kasama ang kanyang sasakyan.
Ayon kay PLt. Mann Erik Felipe, PCP 2 commander ng Novaliches Police Station, agad silang nagsagawa ng dragnet operation at nang makita ng mga pulis ang motorsiklo na kapareho ng ninakaw na motor, sinita nila ang drayber ngunit hindi huminto.
Hinabol ng mga awtoridad ang mga suspek hanggang nakorner sa isang bakanteng lote sa Austria Street, pero imbes sumuko, pinaputukan ng baril ang mga pulis.
Agad gumanti ng pamamaril ang mga pulis hanggang bumulagta ang mga suspek.
Positibong itinuro ng biktima ang ninakaw na motorsiklong sinakyan ng mga suspek na nasamsam ang dalawang baril at sachet ng shabu. (ALMAR DANGUILAN)
