HATAW! D'yaryo ng Bayan hatawtabloid.com
MAHIGIT 900 kagawad ng Philippine National Police (PNP) ang itinalaga upang magbantay sa bisinidad ng Senado sa unang araw ng pagpupulong bilang impeachment court nitong Lunes, 18 Mayo, ayon kay National Capital Region Police Office (NCRPO) spokesperson PMaj. Hazel Asilo.
Kasama sa puwersang nakabantay sa seguridad ng Senado ang Civil Disturbance Management Unit (CDMU) at mga miyembro ng Explosive Ordnance at K9 units — na ilang oras bago ang itinakdang plenary session ay nakitang umiikot sa session hall, sa mga tanggapan sa 2nd floor ng Senate Building.
Nanatili ang barbed wires na na nakainstila sa mga gate ng Senado, na inilagay noong lumutang muli, makalipas ang anim na buwan, si Senador Ronald “Bato” dela Rosa sa plenaryo noong nakaraang Lunes, 11 Mayo.
Kabilang ang Bagong Alyansang Makabayan (BAYAN) sa ilang raliyista na nagpiket sa labas ng Senado para manawagang patalsikin si Vice President Sara Duterte at pakinggan ng mga senador ang kahilingan ng publiko para sa katotohanan, hustisya, at pananagutan.
Binatikos sa protesta ang pamumuno ni Senate President Alan Peter Cayetano at iginiit ang agarang pag-aresto kay Dela Rosa na sinasabing tumakas sa kabila ng protective custody ng Senado.
