SUGATAN ang apat na indibiduwal sa insidente ng banggaan ng isang tricycle at habal-habal sa bayan ng Casiguran, lalawigan ng Aurora, nitong Linggo, 19 Abril.
Batay sa kuha ng video ng vlogger na si Tambay Promax Vlog, makikita ang matinding salpukan kung saan tumilapon ang driver ng habal-habal, habang naipit ang driver ng tricycle kasama ang sakay nito sa likurang bahagi.
Sa inisyal na imbestigasyon, mabilis na umaandar ang habal-habal (kolong-kolong) sa paakyat at kurbadang bahagi ng highway dahilan upang mawalan ng kontrol ang driver hanggang sumalpok sa kasalubong na tricycle.
Sugatan ang driver at sakay ng habal-habal at ang dalawa sa mga lulan ng tricycle ang nasugatan, kabilang ang isang matandang babae.
Agad na nagresponde ang mga tauhan ng Casiguran MPS, katuwang ang mga motorista at bystander sa lugar upang tulungan ang mga biktima.
Mabilis na isinugod sa ospital lulan ng mobile patrol ng pulisya ang mga sugatan para sa agarang pagbibigay ng atensiyong medikal.
Nahaharap sa kasong reckless imprudence resulting in multiple physical injuries at damage to property ang driver ng habal-habal.
Patuloy ang imbestigasyon ng mga awtoridad kaugnay sa insidente. (MICKA BAUTISTA)
