HATAW! D'yaryo ng Bayan hatawtabloid.com
NAARESTO ng mga tauhan ng Pampanga Police Provincial Office (PPO), sa pamumuno ni P/Col. Eugene Marcelo, provincial director, ang no. 3 at no. 8 most wanted persons (MWPs) sa mga bayan ng Macabebe at Masantol, at isang nagbebenta ng loose firearms sa serye ng mga operasyon na isinagawa nitong Linggo, 19 Abril.
Bilang bahagi ng elevated manhunt operations, naaresto ng mga tauhan ng Macabebe MPS ang no. 3 MWP na nagtatago sa kinakaharap na kasong Serious Illegal Detention, isang paglabag sa ilalim ng Art. 267 ng Revised Penal Code (RPC), walang inirekomendang piyansa.
Natunton naman ng Masantol MPS ang no. 8 MWP ng Valenzuela City sa Brgy. Bagang, Masantol, Pampanga.
Nahaharap ang suspek sa tatlong bilang ng kasong Sexual Assault, isang paglabag sa ilalim ng Sec. 5, RA 7610; at tatlong bilang ng kasong Acts of Lasciviousness sa ilalim ng Sec. 5, RA 7610.
Sa patuloy na kampanya laban sa mga loose firearms, naglunsad ang Pampanga 2nd PMFC ng isang buybust operation na humantong sa pagkakaaresto sa 38-anyos suspek na nagbenta ng isang kalibre .38 revolver, kasama ang tatlong pirasong bala, sa isang undercover police officer.
Ayon kay P/Col. Marcelo, ang mga nagawang ito ay sumasalamin sa kanilang matatag na pangako na paglingkuran at protektahan ang kaniyang mga kababayan. (MICKA BAUTISTA)
