Marco sa KPop at PPop, malaki ang impluwensiya sa ating musika

MA at PA
ni Rommel Placente

KAHIT  ilang dekada na sa music industry ay aminado si Marco Sison na kinakabahan pa rin kapag may concert.

Sa aming interview sa kanya, sinabi niyang marami nga raw ang naglalaro sa kanyang isip ngayon bago dumating ang Seasons of OPM concert niya na gaganapin sa July 25 sa The Theater at Solaire. 

Aminado siyang malaki na rin ang ipinagbago ng audience ngayon lalo na sa mga kabataan. Nag-iba na ang taste pagdating sa music at aminado siyang malaki ang naging impluwensiya ng KPop at PPop.

Pero base sa experience niya na patuloy pa rin naman ang career, nakatutuwa aniya na sa mga event na pinupuntahan niya, marami pa ring kabataan ang nakare-relate sa mga pinasikat niyang kanta tulad ng My Love Will See You Through at Always.

Kaya naman ang kanyang nalalapit na concert ay pagbabalik tanaw sa kanyang  musical journey. Para kay Marco, higit pa sa concert ang magaganap. 

Sabi pa niya, “This is my way of giving back to the music that has shaped me,I hope this inspires a new generation to embrace OPM and help carry it forward.”

Special guests ang dalawang matalik na kaibigan niya na sina Nonoy Zuniga at Rey Valera. Kasama rin sina Martin Nievera at Vice Ganda. Musical director niya ang nag-compose ng Si Aida, si Lorna o si Fe na si Louie Ocampo.