HATAW! D'yaryo ng Bayan hatawtabloid.com
PUSH NA’YAN
ni Ambet Nabus
“NAKU ipush na talaga iyan.” Sigaw ng mga beauty enthusiast sa posibleng korona na ibibigay kay Christine Juliane Opiaza bilang Miss Grand International 2024.
Matapos ngang ianunsiyo ni Nawat Itsaragrisil na tinanggalan nila ng korona ang reigning queen na si Rachel Gupta ng India, si CJ na ang inaasahang mabibigyan bilang ito naman ang first runner-up.
Sa inilabas na pahayag ng Miss Grand International organization, tinanggalan nila ng crown si Rachel dahil sa hindi nito pagsunod sa mga tungkulin niya.
Naglabas naman ng pahayag ang Miss India winner na siya ay nag-resign dahil sa hindi na niya makayanan ang mga ka-cheap-an na ipinagagawa sa kanya gaya ng pagbebenta ng kung ano-anong produkto sa Tiktok at iba pa.
Well, ano’t anuman ang maging desisyon ng team ni CJ, malaking bagay pa rin para sa bansa ang magkaroon ng naturang beauty title, mereseng sobra itong eskandaloso at kontrobersiyal.
Itinuturing kasing pasok sa anim na pinaka-prestigious title ang Miss Grand International kasama ng Miss Universe, Miss World, Miss International, Miss Earth, at Miss Supranational, pawang mga korona na napagwagian ng Pilipinas.
Isa na sa mga may-ari ng Miss Universe organization si Nawat na tinatawag na Uncle Nawat ng mga mahihilig sa beauty contests, kaya’t dapat itong tanggapin ni CJ.
Huli man daw at magaling, mananalo pa rin!
