HATAW! D'yaryo ng Bayan hatawtabloid.com
NILIMAS ng dalawang binatilyong edad 14 at 18 anyos ang P50,000 limos o donasyon sa isang simbahang Katoliko, sa lungsod ng Muntinlupa, kasama ang dalawang cellphone, nitong Sabado ng gabi, 1 Marso.
Ayon sa Muntinlupa CPS, naganap ang insidente ng pagnanakaw dakong 9:00 ng gabi kamalawa, sa Parish Office ng St. Peregrine Laziosi Parish, sa National Road, Brgy. Tunasan, sa nabanggit na lungsod.
Nadiskubre ito ng isang kahera ng simbahan dakong 4:30 ng madaling araw nitong Linggo, 2 Marso, saka iniulat sa guwardiya at sa Muntinlupa CPS.
Natuklasan ng guwardiya na sinira ang kandado ng main door ng Parish Office pati ang kandado ng donation box na naglalaman ng pera.
Nabatid sa imbentaryong ginawa ng simbahan na P50,000 donasyon at dalawang cellphone ang nawawala.
Nang balikan ang kuha ng CCTV, makiktia ang dalawang Kabataang responsable sa insidente ng nakawan – parehong nakasuot ng itim na kamisetang mahaba ang manggas, ang isa ay naka-facemask at ang isa ay may hood.
Nagsagawa ng manhunt operation ang Muntinlupa MPS na nagresulta sa pagkakadakip sa dalawang suspek sa Soldiers’ Hills Village, sa Brgy. Putatan, kung saan narekober ang P50,000.
