HATAW! D'yaryo ng Bayan hatawtabloid.com
PINATUNAYAN ni Evelyn O. Francia na hindi balakid ang edad para abutin ang pangarap.
Sa edad 67, gumagawa pa rin ng pangalan sa larangan ng pag-awit sa Amerika si Evelyn. Hindi naman nakapagtataka kung angat ang talento niya dahil sa murang edad pa lang, nagpakitang gilas na si Evelyn sa pagkanta, kahit na ang kanyang entablado ay ang hagdan ng kanilang bahay. Nakamulatan niya ang mga American song dahil sa kanyang ama, na isang militar. Ang ina naman niya ay isang Nurse na humimok sa kanya na kumanta para sa mga pasyente nito.
Ang nakabibilib kay Evelyn, sa kabila ng kanyang ‘stutter’, o diperensiya sa pagsasalita, mas naging inspirasyon niya ito para ipagpatuloy ang pagkanta. Sa kalaunan, natagpuan niya ang pananampalataya at sumali sa Praise and Worship group, na nagbigay sa kanya ng mas malalim na layunin sa pagkanta.
“Music has always been a part of me, and I’m excited to continue this journey, connecting with my fans and spreading a message of hope and faith,” ani Evelyn.
Pangarap din ni Evelyn na mag-record ng mga awitin na maipamamana sa kanyang pamilya at mga kaibigan. Sa kasalukuyan, ang single niyang Open Our Hearts ay nagkaroon na ng global digital release. Ang awitin ay nagpapalaganap ng inspirasyon at pananampalataya.
Sa ipinamalas na pagpupursige at achievements, deserve talaga ni Evelyn na tawaging ‘International Inspirational Wonder.’
Makakasama si Evelyn bilang special guest performer sa pagbabalik ni Nick Vera Perez (NVP) sa Pilipinas next year, 2025, para sa album tour ng Parte Ng Buhay Ko, na bagama’t natapos noong 2022 ay ire-release sa 220 global streaming platforms next year.
Magsisimula ang tour matapos ang grand finale ng hit TV show ni NVP na Laging Ikaw sa May 17, 2025.
Nakilala si NVP hindi lamang sa pagkanta, kundi pati na rin sa modeling, pageantry, at mga charity. Sa kanyang tour, tampok ang mga awitin mula sa Parte Ng Buhay Ko, tulad ng Parte ng Buhay Ko, Biyaya, Paghilom ng Sugat, at Kalendaryo.
Bawat kanta ay sumasalamin sa mahahalagang sandali sa buhay ni NVP.
“Lagi akong excited na bumalik sa Pilipinas,” ani NVP. “Ang album na ito ay mga kuwento sa lahat ng pinagdaanan ko, kaya sabik na akong ibahagi ito sa mga fan ko.”
Ipinahayag naman ni Evelyn ang taos-pusong pasasalamat sa NVP1World Entertainment, LLC dahil muli na naman siyang makakasama sa album tour na ito ni NVP.
“Laging napakalaking oportunidad na makasama sa mga pagtatanghal ni NVP. Taos puso ang pasasalamat ko sa kanya dahil nagtiwala siya sa aking kakayahan,” pahayag ni Evelyn. Pinasasalamatan din niya ang kanyang pamilya at mga kaibigan sa suportang ibinibigay nila.
Sa darating na 2025 promo tour ng Parte ng Buhay Ko, tiyak na hindi lang si NVP ang kaabang-abang kundi pati si Evelyn.
