PATAY sa pamamaril ang isang lalaki matapos pagbabarilin ng isang nakamotorsiklong salarin sa Brgy. Pulong Buangain, sa bayan ng Santa Maria, Bulacan.
Sa ulat na nakalap mula sa Santa Maria Municipal Police Station (MPS), kinilala ang biktima na si Jemmar Mendoza, 36, may-asawa at nakatira sa 4650 Sitio Perez, Brgy Pulong, Buhangin, sa naturang bayan..
Napag-alamang naganap ang pamamaril sa bahagi ng Brgy Pulong Buhangin dakong alas- 2:30 ng hapon, Pebrero 4..
Sa imbestigasyon ay lumitaw na habang sakay ng tricycle ang biktima at pauwi sa kanilang bahay nang biglang paputukan ng suspek na nagresulta sa kanyang kamatayan.
Sinabing tumakas ang suspek sakay ng isang Yamaha NMax na may kulay gray patungo sa direksyon ng Norzagaray, Bulacan.
Agad na humiling ng dragnet operation sa Bulacan Provincial TOC ang Santa Maria MPS para sa activation ng Bulacan Shield Alpha habang patuloy na inaalam ang motibo sa pamamaril. (MICKA BAUTISTA)
