Daluz ng Batangas tatlong medalyang ginto sa Golden Goggles swim series
PINANGUNAHAN ng tubong Batangas na si George Clevic Daluz ang limang promising tanker para sa Most Outstanding Swimmer (MOS) Award nang makakolekta ng tig-tatlong gintong medalya sa pagsasara kahapon ng Congress of Philippine Aquatics Inc., COPA-Golden Goggle Leg 1 at 2 sa Teofilo Yldefonso swimming pool sa Rizal Memorial Sports Center (RMSC) sa Malate, Maynila.
Nanguna ang Grade 1 student ng Agustin Ramos Memorial Elementary School ng Balayan sa 8 years old class na 50m backstroke sa loob ng 51.03 segundo at ang 100m breaststroke (2:01.11) bilang follow-up sa kanyang tagumpay sa 200m freestyle (3:36.78) noong Sabado sa event na pinalakas ng Speedo at suportado ng Philippine Sports Commission at Milo.
Ang iba pang triple-gold winners ay sina Marcus Pablo, John Rey Lee, Samantha Mia Mendoza, at Jamie Aica Summer Sy. Lahat sila ay kalipikado para sa Luzon Championship sa Agosto na ang mga nangungunang manlalangoy ay makasasagupa ang pinakamahuhusay na manlalangoy mula sa Visayas at Mindanao regional championship ng torneo na inorganisa ng Congress of Philippine Aquatics, Inc. sa pamumuno ni swimming icon Batangas 1st District Rep. Eric Buhain . (HTV)
