Alden gagawa ng int’l movie, e-sports tournament

RATED R
ni Rommel Gonzales

WALANG achievement na madaling makuha, kaya naman si Alden Richards, lahat ng tagumpay niya ay pinagpuhunanan niya ng dugo at pawis.

At sa kanyang hirap at sakripisyo na pinagdaanan, marami siyang natuklasang magagandang bagay tungkol sa buhay, lalo na tungkol sa kanyang sarili.

“Hindi naman talaga laging smooth sailing ‘yung buhay natin pero everything that has happened, at the end of the day may mga learning ako roon. So I’m very grateful for it. And I have to admit, hindi naging madali ‘yung 2022,” ani Alden.

Isa sa mga ginawa ni Alden ay ang kumawala sa kanyang comfort zone kaya naman na-explore niya ang pagiging mas malalim na artista, business owner ng mga restaurant, isang seasoned gamer, at producer.

May kaba at takot bago makamit ang bawat tagumpay at hinarap iyon ni Alden.

“’Yung kaba, ‘yung nervousness, iyon ang mga bagay na dapat mong ginagawa kasi it means hindi ka sure sa outcome. As opposed to you’re just in your comfort zone na alam mo na ang lahat ng turnout ng mga ginagawa mo.”

Ngayong 2023, mas mabibigat ang plano ni Alden, tulad ng paggawa ng isang pelikulang for international release, isang TV project na follow-up sa Start-Up PH, at mag-produce pa ng malalaking concerts tulad ng ginawa niya noong 2022 na isa siya sa mga producer ng reunion concert ng Eraserheads, ang Huling El Bimbo.

Mauunang project ni Alden for 2023 ang e-sports tournament ngayong Enero na pinakamalaking gaming tournament sa bansa na magbibigay ng exposure sa Filipino gamers sa iba’t ibang bahagi ng mundo.