Binata bumulagta sa tama ng bala sa ulo’t batok

BUMULAGTA ang isang binata nang malapitang barilin sa ulo at batok ng hindi kilalang gunman sa Quezon City, Miyerkoles ng madaling araw.

Ang biktima ay kinilalang si Abir Gali Aslafal, 27 anyos, binata, walang trabaho, at residente sa San Miguel St., Payatas B, Quezon City.

               Sa report ng Payatas – Bagong Silangan Police Station (PS 13) ng Quezon City Police District (QCPD), bandang 3:15 am kahapon, 6 Hulyo, nang maganap ang insidente sa kalye ng San Miguel Extension St., Brgy. Payatas A, sa lungsod.

Batay sa inisyal na imbestigasyon ni P/Cpl. Claire Benavidez ng PS 13, nakarinig umano ang mga kapitbahay ng biktima nang magkakasunod na putok na baril sa labas ng kanilang tahanan.

               Nang kanilang usisain, nakita nilang nakabulagta ang biktima at umaagos ang dugo sa ulo nito.

               Nakita umano ang suspek habang papatakas dala ang armas na ginamit sa pamamaslang sa biktima.

Nakasamsam ang mga nagrespodeng sina Pat. Kim Arnold Nogoy, P/Cpl. Ajay Paras, Pat. Raymond Sarlatan at Pat. Elmer Nogoy ng dalawang pirasong empty cartridge ng ‘di pa batid na kalibre ng baril at anim na basyo ng bala sa lugar na pinangyarihan ng insidente.

               Nagsasagawa ng imbestigasyon ang mga awtoridad sa motibo ng pamamaril upang matukoy ang nakatakas na suspek. (ALMAR DANGUILAN)