Kim sobrang nalungkot sa pagyao ng manager

NAGLULUKSA ngayon si Kim Rodriguez sa pagyao ng kanyang manager at tumatayong pangalawang ina, si Jennifer Molina dahil sa karamdaman.

Si Jenny kung tawagin ng kanyang mga kaibigan ang CEO & President ng Russell’s Talent Agency na manager din nina Elijah Alejo, Ken Ken Nuyad, Yuna Tangog, Joana Marie Tan atbp..

Ayon kay Kim, “Sobrang nalungkot po ako sa pagyao ni Mama Jenny dahil kung hindi dahil sa kanya siguro hindi ako artista ngayon.

“Siya kasi ‘yung naka-discover sa akin at siya na rin ang tumayong pangalawang ina ko, dahil nasa Japan ang mommy ko.”

Dagdag pa nito, “Siya rin ang nagturo sa akin para magnegosyo, kaya may mga negosyo ako ngayon, mami-miss ko ‘yung pagiging sweet niya at mga pangaral niya sa akin.

“Mahal na mahal ko siya at hinding-hindi ko siya malilimutan habang ako’y nabubuhay.

“Sana ay patuloy niya pa rin akong gabayan pati na rin ang iba pa niyang mga alaga.” pagtatapos ng Kapuso actress.

–30–