HATAW! D'yaryo ng Bayan hatawtabloid.com
NAPASAKAMAY ng mga awtoridad ang tatlong humoldap sa dalawang Chinese national sa Pasay City, kahapon ng madaling araw.
Nasa detention cell ng pulisya , ang mga suspek na kinilalang sina Luis Guilherme de Jesus, 18 anyos, ng 20-D Antipolo St., Barangay 10, Pasay City; Aaron Quirong, 20 anyos, waiter, kitchen staff; at Christopher Lozada, 20, kapwa residente sa Lourdes St., Bgy.6 sa nasabing lungsod.
Kinilala ang mga biktimang sina Li Hong le, 21, at Pan Si Si, 23, food attendant, kapwa Chinese nationals, at nakatira sa Shore Residence.
Base sa ulat ni Pasay police chief P/Col. Bernard Yang, naganap ang insidente sa Sta. Escolastica St., Bgy.13 sa nasabing lungsod, dakong 3:55 am.
Naglalakad ang dalawang Chinese national sa lugar nang biglang sumulpot ang tatlong suspek at tinutukan ng patalim sabay deklara ng holdap.
Sapilitang kinuha ng mga suspek ang pera at cellphone ng dalawang Chinese saka tumakas tiyempo namang nagpapatrolya sina P/Cpl. Tryan Miranda, P/Cpl. Michael Kevin Pinlac, P/Cpl. Eman Chris Mantaring, P/Cpl. Jerson Bauzon, at Pat. Kevin Javier ng Police Community Precinct (PCP) CCP Complex nang mabatid ang insidente sa mga bystander sa lugar.
Hinabol ng mga pulis ang mga suspek na kanilang naabutan sina Quirong at Lozada habang nasakote ng Tactical Motorcycle Riders Unit si De Jesus sa Sta. Monica St., na tumatakbo patungong FB Harisson St.
Narekober sa mga suspek ang limang P1,000 bills, isang power bank at puting cord na tinangay sa mga biktima, dalawang balisong at isang selyadong pakete na naglalaman ng marijuana o kush.
Sasampahan ang tatlong suspek ng kasong robbery, illegal possession of deadly weapon at Comprehensive Dangerous Drugs Act of 2002 (RA 9165) sa Pasay Prosecutor’s Office.
(JAJA GARCIA)
