PATAY ang isang 47-anyos ginang makaraan paputukan ng dalawang beses ng hindi kilalang suspek na lulan ng motorsiklo sa harap ng kanyang anak sa tapat ng isang depot store sa Brgy. Almanza Uno sa Las Piñas City, kamakalawa.
Agad binawian ng buhay sa pinangyarihan ng insidente ang biktimang si Gregoria Sugita, residente sa Buensamino St., Brgy. BF Homes ng nasabing lungsod.
Sa imbestigasyon ng Las Piñas City Police, nangyari ang insidente sa Alabang-Zapote Road dakong 4:00 ng hapon.
Patawid sa kalsada ang ginang kasama ang kanyang 18-anyos anak na si Kenjie, nang barilin nang dalawang beses ng suspek na sakay ng motorsiklo.
Ayon kay Kenjie, hindi niya nakilala ang suspek dahil nakasuot ng helmet.
Patuloy na iniimbestigahan ng pulisya ang insidente. (JAJA GARCIA)
