ZAMBOANGA CITY- Dalawang hinihinalang kasapi ng New People’s Army (NPA) ang napatay habang sa panig ng tropa ng pamahalaan ay isang civilian volunteer ang namatay sa enkwentro sa Purok 7, Brgy. Supon, Bayog, Zamboanga del Sur kamakalawa.
Ayon kay Major Filemon Tan, tagapagsalita ng Western Mindanao Command (WestMinCom), pinuntahan ang lugar ng tropa ng 53rd Infantry Battalion ng Philippine Army (PA), kasama ng mga civilian volunteer upang beripikahin ang report tungkol sa presensiya ng mga NPA.
Dito na nakasagupa ng mga awtoridad ang hindi pa tinukoy na bilang ng mga rebeldeng NPA sa ilalim ng SYP-KARA.
Sa isinagawang clearing operation ng mga sundalo, narekober ang bangkay ng dalawang rebelde na kinilala lamang sa mga pangalang Nilo at Chery.
Nagpapatuloy ang pagtugis ng mga sundalo sa tumakas na mga NPA kasama na rin ang iba pang grupo na nananatili sa lalawigan na nangunguna sa ilang kriminalidad sa lugar.
