UAAP Volleyball sa Ultra ngayon

APAT pang mga pamantasan ang sasabak ngayon sa ikalawang araw ng aksyon sa UAAP Season 78 women’s volleyball sa PhilSports Arena sa Pasig City.

Unang maghaharap ang University of Santo Tomas at Adamson sa alas-dos ng hapon.

Sina EJ Laure at Carmela Tunay ang sasandalan ng Tigresses sa ilalim ng bago nilang head coach na si Kungfu Reyes.

Ngunit hindi makapaglalaro si Pam Lastimosa para sa UST ngayong taong ito dahil sa pilay sa kanyang tuhod.

Ang Lady Falcons naman ay pangungunahan ni Mylene Paat samantalang isa sa mga assistant coaches nila ay ang dating superstar ng La Salle na si Michelle Gumabao.

Sa ikalawang laro sa alas-4 ng hapon ay magbabanggaan ang Lady Spikers at Far Eastern University Lady Tamaraws.

Noong Linggo ay tinalo ng Ateneo at University of the Philippines ang National University at University of the East, ayon sa pagkakasunod, sa Filoil Flying V Arena sa San Juan.

Mapapanood ang mga laro ng UAAP volleyball nang live sa ABS-CBN Sports+Action Channel 23.

( James Ty III )