Gamboa bukas sa pagbabago ng PCCL

PAYAG ang tserman ng Philippine Collegiate Champions League (PCCL) na si Rey Gamboa na baguhin ang format ng National Collegiate Championship sa susunod na taon pagkatapos na biglang pinutol ang torneo ngayong taong ito dahil sa masamang panahon at ang pagsabay nito sa Pasko.

Inamin ni Gamboa na napilitan siyang baguhin ang iskedyul ng NCC dahil inilipat ng UAAP ang pagsisimula ng basketball season sa Setyembre imbes sa Hulyo.

“Definitely, a lot of changes have been made this year because of the change in the collegiate calendar,” wika ni Gamboa. “You know very well that the UAAP league started quite late and we had to request the other leagues in the provinces to follow suit so that they will be on track.”

Matatandaan na ginawang co-champions ng PCCL ang San Beda College at Far Eastern University dahil walang venue para sa championship game na dapat sanang gawin noong Biyernes, bukod sa kailangan nang umuwi ang mga manlalaro sa kani-kanilang mga lalawigan para ipagdiwang ang Pasko kasama ang kani-kanilang mga pamilya.

Umabot pa sa puntong binatikos ng isang kongresista mula sa Cebu ang PCCL dahil sa pagbabago ng format.

“Definitely, we will be meeting with the leagues this coming year and agree on a schedule and format that will still have the objective of having one national champion,” ani Gamboa na dating tserman ng board of governors ng Philippine Basketball Association (PBA). “The changes that have been made in the collegiate basketball calendar have affected our schedule also. We are going to resolve this next year.”

( James Ty III )