NAGPAHAYAG ang team owner ng baguhang koponang Blackwater Sports ang pagnanais nitong kunin si Asi Taulava para sa una nitong kampanya sa PBA sa susunod na season.
Ayon sa team owner ng Elite na si Dioceldo Sy, makakatulong si Taulava para maging malakas ang Blackwater dahil hindi pinayagan ng PBA na direktang iakyat ang ilang mga manlalaro nito mula sa PBA D League.
Dating naglaro si Taulava para sa Blu Detergent, isang koponang pag-aari ni Sy sa Philippine Basketball League noong 1998.
“He’s (Taulava) the best big man around. I think he can still give quality minutes against (June Mar) Fajardo or (Greg) Slaughter,” wika ni Sy sa panayam ng www.spin.ph. “We believe he can be an asset and we can build our team around him. He’s a veteran and experienced already.”
Hanggang Agosto ng taong ito ang kontrata ni Taulava sa Air21.
“Well, we don’t want to go into a bidding war (with Air21) but I’d like to think that we’re ahead when it comes to relationship because we invite him to our house, and he invites us to his house,” dagdag ni Sy.
Bukod kay Taulava, nais din ng Blackwater na kunin ang mga retiradong PBA superstars na sina Marlou Aquino at Kenneth Duremdes.
(James Ty III)
