Team owners ng D League nagbantang umalis
ILANG mga team owners ng PBA D League ang naiinis na sa liga dahil hanggang ngayon ay wala pang TV coverage ang ginaganap na Foundation Cup.
Isang team owner na ayaw magpabanggit ng pangalan ang nagsabing siya ang mangunguna sa mga kapwa niyang team owners na kumalas sa liga at lumipat sa bagong ligang balak itatag ng beteranong coach na si Joe Lipa.
Pakay ni Lipa na ilunsad ang bagong liga sa Hulyo at ipalabas ang mga laro sa bagong sports channel ng ABS-CBN na Sports+Action Channel 23.
Ang bagong liga ni Lipa ay halos pareho sa Metropolitan Basketball Association at Liga Pilipinas na parehong regional ang konsepto ngunit pareho ring nawala dahil sa sobrang laki ng gastos.
Samantala, sinabi ni PBA Media Bureau Chief Willie Marcial na inaayos na ng liga ang TV coverage ng D League.
“Nag-uusap kami ng Aksyon TV. We’re also talking to another station,” wika ni Marcial.
Isang source ang nagsabing ang Solar Sports ay may interes din na i-kober ang D League.
(James Ty III)
